Gjykata e Shkodrës ka vendosur masën e sigurisë “arrest me burg” për Rrok Pepajn, babain e Danjel Pepajt, të akuzuar për vrasjen e dy të rinjve në Malësinë e Madhe.
Nga raportimet mësohet se gjatë seancës, Rrok Pepaj, është shprehur nuk ka dijeni për ngjarjen. Pepaj akuzohet për kultivim të lëndëve narkotike të kryer në bashkëpunim.
Kjo akuzë është mohuar nga ana e tij dhe avokati, i cili ka kërkuar arrest shtëpie për klientin e tij. Rrok Pepaj ka thënë se nuk ka dijeni për parcelat me kanabis duke u shprehur se merrej me mbledhjen e boronicave.
Arrestimi i tij u bë për 29 rrënje kanabis, të cilat u gjetën në parcelën pranë vendit ku u zbuluan edhe trupat e pajetë të Klement Pepajt dhe Vilson Çutajt.
Klement Pepaj dhe Vilson Çutaj u gjenden të vdekur në zonën e Rrencit në Malësinë e Madhe dhe dyshohet se janë vrarë nga Daniel Pepaj, i cili është shpallur tashmë në kërkim nga policia, raporton abcnews.
Dyshohet se konflikti mes të rinjve ka ndodhur për shkak të vjedhjes së një sasie lënde narkotike.
Familja e Rrok Pepajt është ngujuar në banesën e tyre nga frika e ndonjë hakmarrjeje të mundshme.
