Kreu demokrat Lulzim Basha u shpreh sot se vetëm nga inceneratori i Fierit u zhdukën 24 mln euro. Basha tha se kjo është një aferë e pastër korruptive ku janë përfshirë Edi Rama dhe Arben Ahmetaj, ndërsa shtoi se me 24 mln euro mund të ishin ndihmuar me mijëra familje shqiptare apo pensionistë.
“Në Fier është një ngrehinë, inceneratori i Fierit quhet, po vetëm incenerator nuk ka, ku janë zhdukur 24 mln euro, dhe që ky fond mund të ishte përdorur për të subvencionuar fermerët shqiptarë.
Edi Rama, Arben Ahmetaj dhe Klodian Mërtiri kanë vjedhur plot 24 mln euro. Me hir apo pahir SPAK do të detyrohet të hetojë këtë vjedhje masive.
Janë plot 24 mln euro që mund të ishin përdorur për të rritur pensionet, për të mbështetur fermerët, për të ndihmuar familjet në nevojë, apo bizneset në përballimin e krizës”, tha Basha.
Ai premtoi se vit për vit do të ketë një subvencion prej 100 mln euro për fermerët shqiptarë, duke i garantuar jo vetëm mbijetesën, por duke i bërë një shtresë të mesme.
Basha tha se do të ndërtojmë një Shqipëri tjetër dhe jo këtë ku përfitojnë dhe pasurohen vetëm një grusht njerëzish dhe banditët e inceneratorëve.
“Sektori i bujqësisë dhe i blegtorisë janë më të goditurit nga kriza ekonomike. Arsyeja nuk është vetëm pandemia, por braktisja e fermerëve nga qeveria këto 7 vjet. Asnjë subvencion për fermerin, duke e bërë më të braktisurin në rajon.
Paratë e subvencioneve shkojnë për klientët e qeverisë dhe okigarkët. Vetëm për inceneratorin e Fierit, që akoma nuk ekziston, janë zhdukur 24 milionë euro. Është një gropë e zezë korrupsioni, ku është përfshirë Edi Rama, Arben Ahmetaj, figura të krimit të organizuar
Në planin me 5 pika të PD me 24 milionë euro që janë zhdukur për inceneratorin e Fierit, mund të ndihmoheshin 24 mijë biznese Më një çek prej 1 mijë euro për 6 muaj, të ndihmoheshin mijëra fermerë apo mijëra të papunë.
Me ne, vjedhja e parave për projekte si inceneratorët, do të marrë fund, me hir a me pahir. SPAK do të detyrihet ta hetojë dhe do të çohet para drejtësisë dhe prapa hekurave, të ndëshkijë këdo që është përfshirë në këtë vjedhje masive”, tha Basha.
