Detaje të reja zbardhen lidhur me ngjarjen në Malësinë e Madhe, ku një ditë më parë u gjetën trupat e pajetë të Klement Pepajt dhe Vilson Çutaj. Për vrasjen e tyre akuzohet Danjel Pepaj, i cili ka dyshime se është arratisur jashtë vendit, pas krimit. Në pranga është vënë i ati i këtij të fundit, pasi akuzohet se bashkë me të birin kanë kultivuar kanabis.
Krimi dyshohet se ka ndodhur pas një konflikti për çështje droge.
Gjetja e trupave
Policia sqaroi se strukturat e Drejtorisë Vendore Shkodër, menjëherë pas marrjes së njoftimit për humbjen e kontakteve të tre të rinjve me familjarët e tyre në Malësinë e Madhe (të shtunën), organizuan grupe kontrolli në të gjithë zonën duke përdorur edhe dronë.
Njëkohësisht u ngrit një grup i posaçëm hetimor me specialistë të Hetimit të Krimit në DVP Shkodër dhe në Departamentin e Policisë Kriminale në Policinë e Shtetit dhe nën drejtimin e Prokurorisë së Rrethit Gjyqësor Shkodër, vijoi puna për zbardhjen e ngjarjes, pasi dyshohej se të rinjtë mund të ishin vrarë.
Pas kërkimeve në malet e fshatit Vrith, Malësi e Madhe, në vendin e quajtur “Rrenza e Grecajve”, u bë e mundur gjetja e trupave të pajetë të dy të rinjve, Vilson Çutaj, 37 vjeç dhe Klement Pepaj, 21 vjeç.
Nga veprimet e para hetimore, rezultoi se këta dy shtetas ishin vrarë me armë zjarri.
Parcela me hashash dhe arrestimi i Rrok Pepajt
Gjithashtu, nga këqyrja e vendit të ngjarjes dhe kontrollit përreth vendit të ngjarjes u gjetën të kultivuara 29 bimë kanabis.
Në lidhje me këtë ngjarje u arrestua në flagrancë për veprën penale “Kultivim i bimëve narkotike”, shtetasi Rrok Pepaj, lindur dhe banues në fshatin Vrith, Malësi e Madhe.
Ai dyshohet se në bashkëpunim me djalin e tij Danjel Pepaj, 25 vjeç, janë personat që kanë kultivuar 29 bimët narkotike të gjetura në vendin e ngjarjes.
Danjel Pepaj në kërkim
Nga grupi i posaçëm hetimor, është bërë shpallja në kërkim e autorit të dyshuar të vrasjes së dy të rinjve, konkretisht e Danjel Pepajt.
Ai akuzohet për veprat penale “Vrasja në rrethana cilësuese”, “Armëmbajtja pa leje” dhe “Kultivimi i bimëve narkotike”.
“Vijon puna intensive, në bashkëpunim edhe me homologët e vendeve fqinjë, për të bërë të mundur lokalizimin e vendndodhjes, kapjen dhe arrestimin e autorit të dyshuar Danjel Pepaj”, njoftoi policia.
