Një punonjës policie është rrahur nga një qytetar për një gjobë që iu vendos. Ngjarja ka ndodhur në Shkodër ditëne djeshme, ndërsa polici i dhunuar është Hysni Idrizi.
Agresori është identifikuar si Indrit Shtegu. Ngjarja ka ndodhur në qendër të qytetit të Shkodrës në lagjen ‘Parrucë’ në orët e pasdites. Shtegu, i cili është shpallur në kërkim ka parkuar në kundërvajtje mjetin triçikël në lagjen ‘Parrucë’ duke e vendosur në një parkim dysh. Në atë moment efektivi Idrizi është gjendur aty dhe i ka vendosur një gjobë drejtuesit për parkim në kundërvajtje.
Shtegu ka debatuar me efektivin e policisë dhe pas debatit të tyre e ka goditur në fytyrë me grushte, duke i shkaktuar dëmtime të konsiderueshme. Pas kësaj ngjarje efektivi i policisë, Idrizi është dërguar në spitalin rajonal të Shkodrës, ndërsa mësohet se ka thyer nofullën dhe është nën kujdesin e mjekëve.
Menjëherë në vendngjarje kanë mbërritur forca të tjera të policisë, duke nisur hetimet për ngjarjen e rëndë të ndodhur në qendër të qytetit.
Nga kontakti i policisë me familjarët mësohet se këto të fundit janë shprehur duke i thënë efektivëve se Shtegu ka probleme të shëndetit mendor megjithatë kjo mbetet për t’u verifikuar. Tashmë policia vijon kërkimet për arrestimin e Shtegut, i cili akuzohet për veprën penale “goditje për shkak të detyrës ndaj punonjësit të policisë” si dhe “kundërshtim me forcë i punonjësit të policisë”.
