Dy ish-deputetë dhe një ish-kryebashkiak nuk kanë mundur të kualifikohen në garën e brendshme në Partinë Demokratike gjatë votimeve të sotme në qarkun e Korçës.
Pas Klevis Balliut dhe Eduart Kaprit që u skualifikuan në Pogradec për shkak të votave kontestuese, një tjetër kandidat, ish-deputeti, Hekuran Hoxhalli, ka rezultuar humbës në Devoll.
Pra votimet e anëtarësisë së PD në Qarkun e Korçës rrëzuan dy ish-deputetë të listës në zgjedhjet parlamentare të 2017-ës, Balliun dhe Hoxhallin, si dhe ish-Kryebashkiakun e Pogradecit, Eduart Kapri.
Balliu ka marrë 310 vota kontestuese, Kapri ka marrë 170 vota kontestuese, ndërsa Hoxhalli ndoshta mban një rekord në të gjitha votimet e realizuara deri më tani, pasi ka marrë plot 740 vota kontestuese.
Pas Qarkut të Kukësit ku u skualifikuan dy ish-Kryebashkiakë, qarkut të Beratit ku u skualifikua ish-deputeti, Astrit Veliaj, votimet e anëtarësisë në qarkun e Korçës janë surpriza e rradhës për zgjedhjet e kandidatëve nga anëtarësia e PD.
Madje nga raportimet mësohet se votimet në Devoll janë shoqëruar me tensione, pavarësisht pranive të disa prej të deleguarve nga selia qendrore e PD, për të monitoruar procesin.
Po nga raportimet mësohet se përgjatë gjithë kohës ka pasur një përplasje mes grupimeve të ndryshme, veçanërisht në strukturat e PD në Pogradec dhe Devoll.
