Kryeministri Edi Rama u shpreh i vendosur për të miratuar ndryshimet në Kodin Zgjedhor pa konsensusin e opozitës së bashkuar.
Pavarësisht apeleve nga ambasadorët që kërkojnë respektimin e marrëveshjes së 5 qershorit, Rama tha se “ata që u larguan nga Kuvendi duhet të kuptojnë se nuk mund të ndikojnë më në fuqinë e Parlamentit”.
Rama tha se vetëm kalamajtë e vegjël nuk mbajnë përgjegjësi për veprimet e tyre, të gjithë të tjerët duhet të mbajnë përgjegjësi për ato që bëjnë. Në këtë kuadër, Rama tha se nuk mund të pritet më për konsensus pasi qëndrimet janë shumë larg.
“Ndryshimet do të miratohen nga shumica Kushtetuese. Deri tani kemi votuar edhe për Lulin, pasi e kam thënë 35 herë që s´jam për komisione politike zgjedhore, dhe u detyruam të votojmë se kështu donte Luli.
Nesër në Kuvend do të miratohen ndryshimet në Kod me 84 vota, pasi pozicionet tona nga opozita jashtë Parlamentit janë shumë larg.
Ne kemi qenë shërbyes në procesin e reformës zgjedhore. I kemi rënë shumë gjatë kësaj historisë në këtë proces, kemi 30 vjet”, tha Rama.
I pyetur se ku do të kandidojë më 25 prill, Rama tha se është deputet i gjithë Shqipërisë.
“Kam votuar pa pasur aspak qejf që kryetarët e partive të jenë kandidatë në 4 qarqe, por na e kërkoi opozita parlamentare. Në Kosovë kryetarët e partive nuk janë fare në lista dhe ne mund ta bënim një gjë të tillë.
S´ka rëndësi fare se ku do e kem emrin, në Vlorë apo jo, pasi unë jam deputet i gjithë Shqipërisë”, tha Rama.
