Pak ditë më parë, Nezihat Stërmasi, bashkëshortja e legjendës së futbollit Selman Stërmasi, festoi 100-vjetorin e lindjes. Rasti nuk u la pa u shfrytëzuar nga Erion Veliaj, i cili gjatë një vizite në banesën e saj, nuk nguroi të shpërndante mesazhe propagandistike.
Ai u lavdërua si një politikan model që angazhohet për sportin, një lider me virtyte të larta si durimi e ndihma ndaj më të dobëtëve. Me superlativa foli kreu i Bashkisë së Tiranës për veten dhe “punët e mira” që ka bërë si kryebashkiak.
Gjatë bashkëbisedimit me Nezihat Stërmasin, u ndal dhe te problemi i obezitetit te fëmijët. Veliaj fajësoi prindërit që sipas tij, përtojnë ti çojnë fëmijët në aktivitete sportive.
“Kush isha unë fëmijë s’kishte më hëngër, ndërsa tani problemi është obeziteti, sepse prindërit përtojnë ti çojnë fëmijët në sport”, tha Veliaj.
Edhe pse kanë kaluar vite që nga koha për të cilët flet kryebashkiaku, akoma shumë familje sot në Shqipëri e Tiranë ende vuajanë për të siguruar ushqim, ndërsa të tjera kanë të ardhura jo të mjaftueshme për një regjim ushqimor të shëndetshëm.
Jo pak familje në vend jetojnë në varfëri. E për ti shpëtuar mjerimit mijëra zgjedhin të largohen, siç kanë treguar shifrat e azilkërkuesve të vendeve evropiane. Në raportet e tyre, Shqipëria renditet ndër vendet e para për numrin e qytetareve që kërkojnë azil.
Prindërit ndoshta nuk përtojnë ti angazhojnë fëmijët me sport, siç shprehet kryebashkiaku i Tiranës. Por ndoshta edhe sot, si atëherë kur ai ishte fëmijë, ende “s’kanë me hëngër”, apo s’kanë me hëngër siç duhet.
/BN/
