Sezoni 2020/2021 i Kategorisë Superiore ishte parashikuar të niste më 12 shtator, por një gjë e tillë s’ka ndodhur.
Klubet kanë bojkotuar aktivitetin sportiv për shkak të kërkesave të qeverisë për Ligjin e Sponsorizimeve. Duket se kjo situatë i shkon për shtat skuadrës së Partizanit që kishte dy lojtarë të dëmtuar.
Bëhet fjalë për Egzon Belicën dhe Jasir Asanin, dy futbollistë që priten të jenë titullarë me kryeqytetasit. Qendërmbrojtësi ka kaluar dëmtimin, ndërsa Asani tashmë është rikuperuar nga problemi me kaviljen. Ata kanë zbritur në fushë duke u vënë në urdhrat e trajnerit Ilir Daja që tanimë ka një organikë më të plotësuar.
Kujtojmë që 16 herë kampionëve të vendit u është bllokuar merkato nga FIFA dhe ende vijon “beteja” ligjore në CAS teksa pritet që drita jeshile të ndizet për periudhën e janarit. Kësisoj, trajneri Daja është i detyruar të punojë me organikën aktuale që ka në dispozicion.
