Eduard Rroca dhe Besar Musolli mund të quhen nga sot lojtarë të larguar nga Kukësi.
Duke përjashtuar ndonjë surprizë të momenteve të fundit, klubi verilindor ka rënë dakord për të shitur fantazistin te Istanbulspor AS në Ligën e Parë turke.
Kukësi do të përfitojë 100 mijë euro, ndërsa do të ruajë edhe 20% të kartonit të lojtarit.
Rrocës i skadonte kontrata me Kukësin në janar të vitit 2021 dhe në rast se nuk rinovonte, atëherë do të ikte me parametra zero në merkaton e dimrit.
Nga ana tjetër, kapiteni Musolli pas tetë vitesh te verilindorët, ku arriti të fitojë gjithçka, largohet për t’u rikthyer në Kosovë. Ai ka nënshkruar një parakontratë me Gjilanin dhe gjithashtu emri i tij është futur në listën e federimeve nga klubi kosovar.
Për të kaluar te Vllaznia, klubi shkodran është pranë arritjes së marrëveshjes me mesfushorin Fjoart Jonuzi. 24-vjeçari më parë ka qenë pjesë e Kukësit, ku nuk gjeti hapësira. Te Laçi më pas u kthye në titullar të rëndësishëm dhe vjet u aktivizua në Kosovë me Gjilanin.
