Presidenti Ilir Meta e ka cilësuar si tentativë për grusht shteti shkeljen e njëanshme të Marrëveshjes së 5 Qershorit.
“Të mos devijohet asnjë milimetër nga Marrëveshja e 5 Qershorit. Në rast se do të kemi shkelje të njëanshme të marrëveshjes, ashtu siç është bërë me ndryshimet e njëanshme kushtetuese, është e qartë që kemi tentativë për grusht shteti dhe kuptohet që grushti i shtetit do të shtypet nga grushti i popullit”, tha Meta në deklaratën e përjavshme për gazetarët, këtë të Premte.
Meta sfidoi hapur mazhorancën edhe më tej, duke thënë se ajo “e ka provuar me Presidentin” dhe rezultati deri tani është 3-0 në favor të Kreut të Shtetit.
“Nuk ka ligj që e pengon Presidentin të përmbushë misionin e tij kryesor. Mazhoranca e ka provuar me Presidentin, 3-0. Mos të kthehet betejë me Presidentin sepse ky është President i popullit të 2 Marsit. Këtë punë ta zgjidhim në mënyrë të qetë në 25 prill, mos të shpërndahen para 25 prillit dhe të mos dinë ku të futen”, tha Meta.
Kreu i Shtetit ngriti edhe më tej tonet kur tha: “Le të më shkarkojnë po deshën. Të shohim kush e shkarkon më parë njëri-tjetrin”.
Lexo edhe: Meta dorëheqjet si President për tu bërë Ministër i Brendshëm? Përgjigjet kreu i shtetit
