Partia Demokratike ka reaguar pas vendimit të Gjykatës së Lezhës që ka dënuar me 4 vite burgim për shpërdorim detyre ish-kryebashkiakun demokrat të Lezhës Fran Frokaj, lidhur me çështjen e tjetërsimit të pronave në Shëngjin.
“Sapo u njohëm me vendimin e gjykatës për ish kreun e bashkisë së Lezhës zotin Fran Frrokaj. Ne jemi të bindur për punën e shkëlqyer që ai ka bërë për Lezhën dhe qytetarët e saj, sikundër shprehim besimin se zoti Frrokaj ka punuar çdo ditë me përkushtim dhe ndershmëri”, shkruan në Twitter Sekretari i Përgjithshëm i PD, Gazment Bardhi.
Sipas tij, gjykimi në shkallën e parë ka patur mungesë transparence dhe indicie të forta për ndërhyrje të papërshtatshme politike.
“Jemi informuar gjithashtu se z. Frrokaj do ta apelojë vendimin. Ne shprehim bindjen se gjykimi në shkallët më të larta i kësaj çështje do të nxjerrë në dritë të vërtetën. Ne i bëjmë thirrje organeve të drejtësisë ti qëndrojnë sa më larg ndikimeve të politikës në këtë proces dhe të bëjnë drejtësi”, shton Bardhi.
Lexo edhe:
Vendimet/ 16 dënime për tjetërsimin e pronave, 4 vite burg për ish-kryebashkiakun Fran Frokaj
