Një tërmet 4.2 ballë të shkallës Rihter ka goditur vendin tonë mbrëmjen e sotme. Tërmeti kishte intensitet makrosizmik 3 ballë të shkallës Merkali.
Lëkundja u regjistrua 10 km në veriperëndim të Lezhës dhe 55 km larg Tiranës.
Sizmiologu Edmond Dushi thotë se nuk ka vend për panik për banorët e Lezhës, por jo vetëm, për tërmetin e ndjerë mbrëmjen e kësaj të shtune.
Ai konfirmoi për “Vizion Plus” se kemi të bëjmë me një tërmet i izoluar, që nuk ka lidhje me atë të Durrësit të rënë në nëntor.
Gjithashtu, Dushi sqaroi se deri tani nuk ka raportime për aktivitet të shtuar sizmik në atë zonë, çka do të thotë se nuk priten lëkundje të tjera.
“Ky është një tërmet që nuk ka lidhje me atë të Durrësit në muajin nëntor. Tërmeti është ndjerë sepse po kaloi një magnitudë që është mbi 3.5 Rihter, atëherë ndjeshmëria është më e madhe. Në bazë të informacionit nga rrethi jonë dhe nga rrethe të tjera ne nuk gjykojmë që për momentin të ketë një aktivitet të shtuar sizmik në atë zonë që do të përbënte një shqetësim. Deri tani është një ngjarje e izoluar dhe ne shpresojmë që do të mbetet e tillë. Nuk kam informacion për raportime për dëme materiale dhe besoj se edhe magnitude nuk lë vend për të pritur diçka të tillë,”- tha Dushi.
