Zgjedhjet e ardhshme parlamentare do të mbahen më 25 prill, ndërsa partitë politike kanë nisur përgatitjet dhe fushatën, edhe pse zyrtarisht ajo duhet të nisë në mars.
Kryeministri Edi Rama dhe Rilindja do të synojnë një mandat të tretë qeverisës, ndërsa opozita e bashkuar, synon largimin e Ramës nga pushteti, duke e përcaktuar si të keqen e madhe për shqiptarët.
Në ditët e fundit Rama ka zhvilluar disa takime me strukturat socialiste, grupin parlamentar dhe kryetarët e bashkive të dala nga votimet e 30 qershorit 2019, ku ka vënë theksin në fitimin e zgjedhjeve, madje duke përcaktuar edhe shifrën 74 si mandatet që duhet të fitohen prej PS në 25 prill.
Kundër idesë se Rama mund të fitojë një mandat të 3-të janë shfaqur edhe shumë analistë, që deri diku kanë mbështetur politikat e Kryeministrit aktual.
Mbrëmjen e djeshme, në emisionin “Opinion”, ndër të tjera, Edi rama ka komentuar edhe një qëndrim të shprehur nga Blendi Fevziu, drejtues i emisionit, i cili ka pohuar se Kryeministri nuk meritonte një mandat të tretë.
“Edhe unë që të përfaqësoj edhe ty, e di që nuk e meritoj një mandat të tretë”, tha Rama, ndërsa Fevziu e pasoi “shumë mirë që e di edhe vetë që nuk e meriton”.
Por, nuk është çudi që Rama të dalë dhe të paraqesë pohimin e tij ose si një sajesë mediatike, ose si një keqkuptim, sikundër ka ndodhur edhe më parë me situata të ngjashme. Ajo që dihet është se mandatin e dytë qeverisës, Rama e fitoi pa një program, pa premtime, me timon dhe tepsi, ndërsa shfaqej herë me tuta dhe herë me çitjane, duke hedhur batuta dhe duke bërë gallatë.
