Me dopietën e realizuar ndaj Suedisë në Ligën e Kombeve, Cristiano Ronaldo preku kuotën e 101 golave të shënuar me fanellën e Portugalisë dhe tani është vetëm 8 gola larg rekordit që mbahet nga Ali Daei, i cili ka shënuar 109 gola me Iranin.
Ylli portugez ka shënuar 101 golat e tij ndaj 41 përfaqësueseve të ndryshme, megjithatë edhe një emër si Cristiano Ronaldo ka “makthet” e tij, pasi janë plot 5 skuadra përfaqësuese të cilave nuk ka arritur t’u shënojë asnjë gol.
Bëhet fjalë për emrat e mëdhenj të futbollit botëror si Gjermania, Franca, Brazili e Anglia, ndërsa pesëshja kompletohet nga Kombëtarja Shqiptare, ndaj të cilës Ronaldo ka luajtur katër herë dhe nuk ka shënuar asnjë gol.
Hera e parë që sulmuesi portugez u përball me kuqezinjtë ishte më 11 tetor të 2003-shit, në një sfidë miqësore të cilën luzitanët e fituan me shifrat 5-3, ndërsa krahas Ronaldos, në fushë ishte edhe Luis Figo.
Më pas Portugalia e Shqipëria u përballën në eliminatoret e Kupës së Botës 2010 në Portugali dhe sfida përfundoi në barazim 0-0, ndërsa u veçua një paraqitje e jashtëzakonshme e Kristi Vangjelit, që u shndërrua në hijen e Ronaldos.
Në ndeshjen e kthimit, në qershor të 2009-ës, portugezët triumfuan 1-2 në “Qemal Stafa” me golat e Hugo Almeidës dhe Bruno Alves, ndërsa Ronaldo ishte sërish titullar, por pa arritur të shënojë.
Hera e fundit që portugezi ka luajtur kundër Shqipërisë ka qenë më 7 shtator të 2015-ës në “Elbasan Arena”, ku luzitanët fituan 0-1 falë një goli te Miguel Velosos në minutat shtesë, ndërsa edhe në këtë takim CR7 ishte titullar.
