Kryeministri Edi Rama tha sot se marrëveshja mes Kosovës e Serbisë e nënshkruar në Uashington në praninë e Presidentit amerikan Donald Trump nuk ka asgjë të re.
Rama theksoi se ishte një moment i rëndësishëm për marrëdhëniet mes dy shteteve por se temat janë të procesit të Berlinit. Sipas tij, është humbur shumë kohë dhe dëmet janë të pallogaritshme.
“Lidhur me marrëveshjen e bërë në Uashington mes Serbisë e Kosovës, patjetër që ishte një moment i rëndësishëm në marrëdhëniet mes dy shteteve, patjetër që ishte e rëndësishme që në funksion të këtij momenti u bë dhe njohja e Kosovës nga Izraeli por përtej që kjo marrëveshje u bë në shtëpinë e Bardhë, marrëveshja nuk ka asgjë të re. Temat e asaj marrëveshjeje janë tema të procesit të Berlinit, të stërdiskutuara. E them këtë për një arsye shumë të thjeshtë. Për të kuptuar se sa shumë kohë kemi humbur ne si shqiptarë në raport me çfarë faktikisht sjell marrëveshja. Sjell një konfirmim të çka ka qenë aty për vite. Refuzimi ka sjellë një humbje kohe. Një humbje kohe që ka dëme të pallogaritshme. Humbja e kohës nga patriotizmi farsë dhe nga një luftë imagjinare me një fqinj që ishte dje armik, sot është një fqinj me të cilin shqiptarët kanë llogari të hapura për të adresuar por nuk mund t’i adresosh në kohën e paqes dhe të bësh sikur je në luftë”, deklaroi Rama.
