Presidenti Ilir Meta dekreton 25 prillin, si datën e mbajtjes së zgjedhjeve të ardhshme parlamentare. Dekreti i Metës erdhi pas konsultimeve që zhvilloi me përfaqësues të opozitës dhe mazhorancës dy ditë më parë.
Opozita e bashkuar propozoi datën 18 prill për mbajtjen e zgjedhjeve, ndërsa socialistët nuk dhanë ndonjë preferencë, edhe pse Taulant Balla, kishte deklaruar se parapëlqente datën 9 maj.
Gjithsesi Kreu i Shtetit ka vendosur që të dekretojë datën 25 prill, të dielën e dytë, brenda periudhës zgjedhore, e cila nis më 15 prill dhe përfundon më 15 maj.
Dekreti
Në mbështetje të nenit 65, pikat 1 dhe 2, 92 shkronja “gj” dhe 93 të Kushtetutës së Republikës së Shqipërisë, si dhe të nenit 8, 9, pikat 1 dhe 4 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar, si dhe pas konsultimit me partitë politike mbi caktimin e datës së zgjedhjeve për Kuvendin e Shqipërisë,
D e k r e t o j:
Neni 1
Zgjedhjet për Kuvendin të zhvillohen ditën e diel, më datë 25 prill 2021.
Neni 2
Ky dekret hyn në fuqi menjëherë.
Nr. Dekreti 11700
Tiranë, më 06.09.2020
PRESIDENTI I REPUBLIKËS
ILIR META
