Shqipëria luan mbrëmjen e nesërme ndaj Bjellorusisë në ndeshjen e vlefshme për Ligën e Kombeve. Kuqezinjtë bëjnë pjesë në grupin C4 së bashku me Lituaninë, Kazakistanin dhe Bjellorusinë.
Objektivi i skuadrës së drejtuar nga Edi Reja është vendi i parë teksa për ndeshjen e nesërme ekipi kombëtar do të ketë disa mungesa të rëndësishme.
Të gatshëm nuk do të jenë Ermir Lenjani dhe Florian Kamberi të cilët nuk mbërritën për shkak të regjimit të karantinës që duhet të kryejnë në Zvicër. Gjithashtu, një nga lojtarët më në formë të këtij sezoni, Marash Kumbulla, rezultoi i dëmtuar. Ndërkohë që ditën e djeshme në listën e mungesave u shtuan edhe Ardian Ismajli, Hysen Memolla dhe Ylber Ramadani.
Në Minsk, pritet që trajneri të vendosë treshen Gjimshiti, Veseli dhe Dermaku, të rreshtuar para portierit që me gjasë nga starti do jetë Strakosha.
Në mesfushë, “gladiatori” Gjasula me “pitbullët” Keidi Bare dhe Amir Abrashi mund të kenë në mbështetje kapitenin Hysaj dhe një mes Trashit dhe Roshit në të majtë.
Në sulm, Cikalleshi duket se ofron garancinë që kërkon trajneri por i gatshëm është edhe Armando Sadiku. Bashkë me njërin prej tyre, Manaj shihet si më i sigurt për fanellën e titullarit. Kjo, në bazë të asaj çfarë është provuar nga trajneri.
Formacioni i mundshëm
Shqipëria: 3-5-2 Strakosha; Dermaku, Gjimshiti, Veseli; Hysaj, Bare, Gjasula, Abrashi, Trashi (Roshi); Manaj, Cikalleshi (Sadiku)
