Spitali “Shefqet Ndroqi”, i shndërruar në “Covid 2” ka reaguar pas ngjarjes së rëndë të ndodhur mbrëmjen e djeshme, kur pacienti 65 vjeçar i dha fund jetës, duke u hedhur nga kati i katërt i godinës.
Përmes një deklarate, spitali informon se “65-vjeçari ishte shtruar një ditë më parë në spitalin “Shefqet Ndroqi”, me pneumoni të shkaktuar si pasojë e virusit SARS COV2 dhe po trajtohej me terapinë e plotë të mjekimit”.
Pa dhënë detaje se si ka ndodhur ngjarja, “stafi i spitalit universitar “Shefqet Ndroqi” siguron qytetarët se po vijojë të jetë në shërbim 24/7 për të garantuar shërbimin shëndetësor për pacientët që trajtohen në spitalin tonë”.
Pacienti Hasan Mira është viktima e dytë në Sanatorium që i jep fund jetës duke u vetëvrarë. I infektuar me koronavirus dhe i shtruar prej dy ditësh në Spitalin “Shefqet Ndroqi”, 65-vjeçari nga Klosi i ka dhënë fund jetës tragjikisht, duke u hedhur nga kati 4-t i spitalit.
Në 13 gusht, një 29-vjeçar nga Durrësi po ashtu i ka dhënë fund jetës, duke u hedhur nga kati i tretë i spitalit. Zyrtarisht flitet për gjendje të rënduar psikologjike, por qartësisht diçka e rëndë po ndodh te Sanatoriumi.
Reagimi i spitalit
Stafi i spitalit universitar “Shefqet Ndroqi” shpreh dhimbjen për humbjen e jetës së 65-vjeçarit me inicialet H.M, i cili i dha fund jetës mbrëmjen e sotme dhe i shpreh ngushëllimet më të sinqerta familjes së tij në këto momente të vështira.
65-vjeçari ishte shtruar një ditë më parë në spitalin “Shefqet Ndroqi”, me pneumoni të shkaktuar si pasojë e virusit SARS COV2 dhe po trajtohej me terapinë e plotë të mjekimit.
Duke shprehur edhe një herë dhimbjen për këtë ngjarje të rëndë, stafi i spitalit universitar “Shefqet Ndroqi” siguron qytetarët se po vijojë të jetë në shërbim 24/7 për të garantuar shërbimin shëndetësor për pacientët që trajtohen në spitalin tonë.
