Nga Boldnews.al
Në familjen e djalit 10-vjeçar lotët ende shkojnë në faqet e prindërve dhe të afërmve. Në ditën e tretë të mortit, qeveria jonë bën një gjest çnjerëzor, jo në vlerë, por në sjellje, duke vënë “çmimin” për jetën e një fëmije e cila u shtyp për vdekje nga një autoambulancë në Kakavijë.
Ai bashkë me familjen po priste në radhën e gjatë, mes stresit, mungesës së ushqimeve dhe pikut të diellit që të trullos mendjen e shpirtin. Një levizje e vogël bëri që të dilte në anë të rrugës ku u përplas nga autoambulanca, e cila ikte e vinte duke marrë njerëz që u binte të fikët nga pritja e gjatë në kufi.
“Ishte thjesht një aksident”- mund të gjykojë dikush, – “Fatkeqësi që ndodh”- e argumenton një tjetër. Po reagimi i ulët, i pisët dhe në kapërcim të kufirit njerëzor të kryeministrit tonë, si e gjykojnë?
“Sot vendosëm që si qeveri të asistojmë familjen e të miturit që humbi tragjikisht jetën pasi i preu rrugën autoambulancës në Kakavi, me një shumë prej 500.000 lekësh të reja, duke i rishprehur dhe njëherë familjes ngushëllimet tona më të ndjera. Engjëlli i vogël u dhëntë forcë”-shkruan kryeministri Edi Rama në një nga rrjetet e tij sociale.
Kaq vlen jeta e një vogëlushi, i copëtuar në aksident pikërisht duke pritur në radhën e gjatë që i erdhi nga papërgjeshmëria e një qeverie.
Aq i ka kushtuar ceremonia e varrimit. Jeta e tij iku tragjikisht, por fyerjen kush nuk ua ka borxh. Një lajm i tillë nuk duhej bërë publik, pavarësisht vendimit për të “dëmshpërblyer” jetën e një të mituri në rritje, por që ai aksident duke pritur në kufi të vret ëshe më shumë se një ngjarje.
Nxitimi i Ramës për të bërë publik një vendim për “dëmshpërblimin” e 5 milionë lekëve të vjetra është shumëfish më e rëndë se vetë ngjarja. Ai dha një “çmim”, pasi për një qeveri të nginjun nga aferat gjithçka shitet e blihet. Blihet vota, pushteti, posti dhe kur ndodhin këto, nuk e kanë problem të “blejnë” edhe humbjen e një jete.
Kaq pak vlen një vdekje që mund të ishte shmangur. Shumë pikëpyetje ngrihen. Po sikur mos kishte radhë të gjata në pritje për të kaluar kufirin grek, a do ndodhte aksidenti? JO! Po për ata që jënë besimtarë apo me bestytni, mund të mendojnë se “aty ishte e shkruar”…! Në fakt aty e kishte shkruar papërgjegjshmëria dhe malinjiteti i një qeverie të degraduar që la mijëra qytetarë në radhë kilometrike për pesë ditë dhe net, mes tyre gra dhe fëmijë!
