Nga BoldNews.al
Burime të brendshme nga Gjykata e Lartë ngrenë dyshime të forta se ankimi që Komisioneri Publik, Florian Ballhysa, ushtroi ndaj vendimit për konfirmimin në detyrë të ish-kryetarit, Xhezair Zaganjori, mbart në vetëvete nota subjektivizmi dhe, me shumë mundësi, edhe “hakmarrje personale”.
Ballhysa ishte këshilltar ligjor në Gjykatën e Lartë, institucion i drejtuar nga Zaganjori, para se ai të bashkohej në strukturat e Vetingut.
Gjatë kohës që ka ushtruar detyrën në Gjykatën e Lartë, raportet e Florian Ballhysës me titullarin, Xhezair Zaganjori, nuk karakterizoheshin ndër më të mirat e mundshme, siç kujtojnë ish-kolegët e tyre në institucionin më të lartë të drejtësisë në vend.
Madje, sipas të njëjtave burime, Zaganjori i ka hequr edhe ditë pune këshilltarit Ballhysa dhe kjo duket se ka shënuar pikën e thyerjes mes tyre. Madje, sipas burimeve nga stafi brenda Gjykatës së Lartë, ai duket se është shprehur që do të vijë momenti për t’ia kthyer Zaganjorit me të njëjtën mënyrë.
Në këtë situatë, juristi Ballhysa aplikon për një post në strukturat e reja të Vetingut, duke kërkuar, me shumë mundësi, të shmangë përplasje të tjera me kreun e tij të asaj kohe, Zaganjori.
Florian Ballhysa konkuron dhe emërohet një ndër dy Komisionerët Publikë, strukturë që ka tagrin ligjor për të ankimuar vendimet e konfirmimit në detyrë të gjyqtarëve dhe prokurorëve në procesin e Vetingut.
Ai gjithashtu rezulton se ka nënshkruar ankimet e vetme ndaj ish-anëtarëve të Gjykatës së Lartë- Xhezair Zaganjorit dhe Edmond Islamajt, të cilët u shkarkuan më pas nga Kolegji i Posaçëm i Apelimit (KPA).
Zaganjori, ish-drejtues i Gjykatës së Lartë, u konfirmua në detyrë nga Komisioni i Pavarur i Kualifikimit në Korrik 2018, pavarësisht problematikave me pasurinë që u konstatuan nga Komisioni i Pavarur i Kualifikimit.
Në dhjetor 2018, institucioni i Komisionerëve Publikë njoftoi publikisht se kishte ankimuar vendimin për Zaganjorin, duke kërkuar shkarkimin e tij nga Kolegji i Posaçëm i Apelimit.
Ankimi ishte nënshkruar nga ish-vartësi i Zaganjorit, Florian Ballhysa.
Punonjësit brenda Gjykatës së Lartë nuk duan të komentojnë nëse ishte i drejtë ankimi apo jo.
Megjithatë, ata mendojnë se, më e pakta, ankimi nuk duhej të nënshkruhej nga Ballhysa, për të dëshmuar një lloj mirënjohje për faktin se kishin punuar për disa vite në të njëjtin institucion.
Në fakt, Komisioneri Publik, Florian Ballhysa, mund të kishte shmangur konfliktin në dukje të interesave në ankimin për Xhezair Zaganjorin.
Detyra e Komisionerit Publik ushtrohet nga dy persona dhe, nëse ata vlerësonin se vendimi pozitiv për ish-kreun e Gjykatës së Lartë, Xhezair Zaganjori, duhej ankimuar, këtë mund të kryente formalisht anëtari tjetër, Darjel Sina.
Por, siç rezulton nga të dhënat zyrtare, ankimi kundër ish-kreut të Gjykatës së Lartë është nënshkruar dhe më tej ndjekur e përfaqësuar në Kolegjin e Apelimit nga Florian Ballhysa, ish-vartës i Zaganjorit, me të cilin, nuk duket se ka pasur raporte të mira.
