Pas 5 ditësh, emigrantë shqiptarë u torturuan, duke pritur me ditë të tëra, me barkun bosh e buzët e thara nga etja, nën të nxehtin e Gushtit, të kalonin doganën e Kakavijës.
Sot, kur situata ka marrë zgjidhje (më në fund!), zëvendëskryeministri Erion Braçe zgjodhi të reagojë.
Në një status në rrjetet sociale, në mënyrë të pakuptimtë, ai bën me faj … opozitën.
“LYLI PO FLE ENDE, PO FLE EDHE LALEZZIU! SHTETAS SHQIPTARE REZIDENTE NE GREQI, SHTETAS SHQIPTARE TE MINORITETIT GREK E SHTETAS GREKE TANI JANE NE SHTEPITE E TYRE! KAKAVIA U BOSHATIS!”, shkruan zëvendëskryeministri.
Më tej, vesh petkun e shtriganit, teksa pretendon se ka dëgjuar lutjet që opozita i ka drejtuar Qiellit.
Ata “u lutën që radha (në Kakvijë) mos të shkurtohej”, shkruan numri dy i Qeverisë, në reagimin e tij në Instagram.
Për një moment, duket se Braçe kthjellohet, teksa bën apel për përmirësimin e punës së institucioneve shtetërore.
Vijon duke bërë me faj qytetarët, që sipas tij, “vijojnë të sillen si në të shkuarën”.
Në fund, e mbyll ashtu si e nisi, duke akuzuar opozitën. Këtu nuk harron të flasë as për Presidentin Ilir Meta.
“Mllefi e urrejtja nuk i kaloi njerezit ne kufi, as Iliri qe urren qeverine e cdo sherbyes publik, as Lyli qe do qeverine e tij si perseritje me gjak”!
