Në pritje të zyrtarizimit të afrimeve të reja, Vllaznia ka blinduar një nga elementët më të spikatur të skuadrës, mesfushorin e talentuar Ardit Krymi, i cili ka firmosur kontratën e re që do ta mbajë me fanellën kuqeblu deri në verën e 2022-shit.
Burime për Supersport konfirmojnë se tashmë mesfushori 24-vjeçar ka firmosur kontratën e re me Vllazninë dhe është gati të marrë një rol lideri në skuadrën e re që po mundohen të ndërtojnë në Shkodër.
Ardit Krymi është rritur në skuadrat e moshave të Vllaznisë dhe ka debutuar në ekipin e parë në 2014-ën, kur ishte vetëm 18-vjeçar, ndërsa këtë vit mbylli sezonin e gjashtë me fanellën kuqeblu.
Mesfushori 24-vjeçar ka qenë nga më të lakmuarit prej skuadrave të tjera, por tani ka konfirmuar qëndrimin te Vllaznia, ndërsa drejtuesit e klubit shkodran po punojnë në disa pista dhe shumë shpejt do të prezantojnë afrimet e reja.
