Kampionët e Kategorisë Superiore, Tirana, ka rinisur përgatitjet në kuadër të kualifikueseve të UEFA Champions League.
Skuadra ka udhëtuar drejt Pogradecit, aty ku do të zhvillojë një mini-fazë përgatitore deri më 14 Gusht e më tej do të jetë gati për sfidën e parë në Champions League pas 11 vitesh.
Trajneri Emanuel Egbo ka folur për misionin e radhës të bardhebluve teksa ka theksuar se maksimumi për skuadrën e tij do të ishte kualifikimi në grupet e Champions League apo Europa League.
“Nuk kishim shumë kohë për të pushuar, por as për të festuar, pasi do të nisim menjëherë përgatitjet për eliminatoret e Ligës së Kampionëve. Mund të them se tani ka filluar sezoni për ne dhe do të shkojmë për një minifazë përgatitore, që të përfaqësohemi sa më mirë në eliminatoret e Ligës së Kampionëve”.
“Ia dolëm të fitojmë titullin kampion pas 11 vitesh dhe duam të bëjmë një paraqitje mjaft të mirë edhe në eliminatoret e Champions Leagues. Me ndihmën e zotit, do të donim të arrinim grupet e Champions-it, apo Europa Leagues dhe besoj se kjo do të ishte maksimumi për ne”, tha trajneri i Tiranës.
