Kryetari i Kuvendit Ilir Meta deklaroi nga Greqia se ekzistojnë ende dy qasje të ndryshme për çështjen çame.
Pas takimit me ministrin e Jashtëm Nikos Kotsias, i pyetur nga gazetarët në lidhje me këtë çështje, Meta foli me një gjuhë të drunjtë diplomatike, duke mos thënë asgjë të re, por duke përsëritur se është e mundur që problemet e së kaluarës të shkojnë drejt një zgjidhje ku përfitojnë të dy vendet.
“Në këtë kuadër unë besoj se për çështjen “Çame” që ju pyetët, ekzistojnë ende dy qasje të ndryshme le të themi, por unë besoj se me durim dhe mënyrë konstruktive, ne kemi mundësi të ecim për gjithë problemet e së kaluarës drejt një zgjidhjeje ku përfitojnë të dy vendet tona dhe të dy popujt tanë. Por ajo që dua të nënvizoj edhe njëherë është se qëllimi i vizitës sonë është të nxisim akoma më tej frymën pozitive të bashkëpunimit midis dy vendeve tona në mënyrë që të mos humbasim aspak kohë për t’u përballur me sfidat me të cilat ndeshen të dy vendet tona, vendet e rajonit tonë, dhe që janë vendimtare për mirëqenien e qytetarëve tanë”, tha kreu i Kuvendit. Meta dha se është shumë e rëndësishme që si Greqia edhe Shqipëria të përqendrohen tek e ardhmja e përbashkët. Ndërsa për çështjet e trashëguara duhet diskutuar në mënyrë racionale dhe konstruktive.
Gjatë takimit me Nikos Kotsias, Meta preku edhe çështjen e ligjit të luftës dhe shprehu bindjen se abrogimi i tij do të krijonte hapësira për çlirimin e çështjeve të tjera të mbetura pezull.
