Një mjek kirurg në spitalin e Beratit ka rezultuar pozitiv nga Covid-19. Kjo ka sjellë edhe mbylljen e Repartit të Kirurgjisë.
Mjeku 40-vjeçar është dërguar drejt Spitalit Infektiv në Tiranë, kurse të gjithë punonjësit e Repartit po i nënshtrohen tamponit.
Kirurgu 40-vjeç E.Q, pas shenjave të infektimit me koronavirus ka kryer tamponin, përgjigjia e të cilit ka rezultuar “pozitive”.
Mësohet se mjeku kirurg është transportuar me urgjencë drejt Spitalit Infektiv në Tiranë pasi gjendja e tij është përkeqësuar sepse 40-vjeçari E.Q vuan edhe nga diabeti. Pas konfirmimit “pozitiv” të kirurgut, Drejtoria e Shëndetit Publik në Berat dhe Inspektoriati i Higjenës kanë mbyllur Repartin e Kirurgjisë dhe kanë kryer edhe dezinfektimin e sallave të operacionit dhe ambienteve të tjera të Repartit.
Mësohet se stafi mjekësor i është nënshtruar kryerjes së tamponeve, edhe pse nuk konfirmohet nga askush brenda Drejtorisë së Shëndetit Publik në Berat sesa është numri i personelit shëndetësor që ka kryer tamponin dhe si po vijon hetimi epidemiologjik i rasteve të kontaktit që ka pasur mjeku kirurg, familja e të cilit është vetëkarantinuar në banesë.
