Publikimi i kësaj videoje si edhe i simboleve të ISIS në Facebook i ka kushtuar një dënim me 3 vjet burg ish-komandos Erzen Uka.
30 vjeçari u shpall fajtor nga Gjykata e Tiranës për “nxitje, thirrje publike dhe propagandë për kryerjen e veprave me qëllime terroriste”.
Erzen Uka
Uka, ish-paqeruajtës në Irak u arrestua në prill të vitit të kaluar nga anti-terrori, për shkak të postimeve të tij me natyrë ekstremiste.
Sipas vendimit të gjykatës, një javë para se të prangosej nga anti-terrori, në profilin në Facebook me emrin Hamzah Uka, ish-komandoja kishte postuar këtë video me diciturën “Heqja e pistoletës nga dora e kundërshtarit!. Stërvitje”. Në të njëjtën ditë, ai kishte postuar këtë video me shënimin “Përgatitini fëmijët tuaj fizikisht dhe psikologjikisht”.
Gjykata arsyeton se në profilin e Ukës, i njohur për prirje radikale ekstremiste dhe simpatizant i ISIS, janë vërejtur edhe foto të simboleve të kësaj organizate dhe shfaq admirimi për krerët e saj. Uka u fajësua edhe për dy fishekë, që u gjendën në banesë pas arrestimit.
Në gjykim ish-komandoja mohoi akuzën për “nxitje terrori”, ndërsa për dy fishekët tha se i kishte mbajtur për shkak të ish-funksionit të tij si ushtarak.
