Kapiteni i Tiranës, Erando Karabeci, ka ngritur trofeun e titullit kampion të Kategorisë Superiore për sezonin 2019-2020.
Bardheblutë kanë nisur festën menjëherë pasi trofeu iu dorëzua nga presidenti i Republikës së Shqipërisë, Ilir Meta.
Menjëherë pas ngritjes së trofeut, kanë shpërthyer fishekzjarrë të shumte dhe shirita bardheblu, të cilët e kanë ndezur atmosferën edhe pse pa praninë e tifozëve, të cilët janë mbledhur nëpër sheshet e kryeqytetit për të festuar edhe pse në kushte të cunguara këtë moment emocionues që kishin plot 11-vite që e prisnin.
Tirana e nisi këtë sezon jo si pretendente për titull. Madje skuadra e financuar nga Refik Halili vuajti në fillimin e sezonit çka solli edhe shkarkimin e trajnerit Ardian Mema.
Vendin e tij e mori Emmanuel Egbo i cili u ambientua menjëherë në rolin e ri duke fituar besimin e lojtarëve dhe klubit. Nën drejtimin e tij Tirana arriti rezultate pozitive të njëpasnjëshme duke u konfirmuar ndeshje pas ndeshje si pretendente kryesore për titull, objektiv të cilin e arriti zyrtarisht më datë 19 korrik.
