Kryeministri i Kosovës, Avdullah Hoti, konfirmon se me Serbinë nuk do të ketë dialog teknik. Ai njoftoi se në bisedimet për normalizimin e marrëdhënieve, qeveria e Prishtinës ka synimet e qarta dhe do të kërkohet vetëm njohja reciproke. Gjithashtu, ai nënvizon se do të mbështesë me forcë platformën për marrëveshjen finale Kosovë-Serbi, të prezantuar në Samitin e Parisit.
“Ne hymë në këtë proces me objektiva të qarta për të përmbyllur këtë proces, e jo për dialog teknik”, u shpreh Avdullah Hoti.
Të gjithë liderët politikë në Kosovë kanë dalë kundër idesë për dialog teknik duke filluar nga presidenti i vendit, Hashim Thaçi. Hoti komentoi dhe kompetencat e koordinatorit shtetëror për bisedimet me Beogradin, Skënder Hyseni, i cili do të marrë pjesë të enjten në një takim në Bruksel.
“Ai flet në emër timin në tavolinën e dialogut. Nesër ai është në Bruksel bashkë me Makollin që merret me çështjen e të pagjeturve për të draftuar marrëveshjen finale për çështjen e të pa gjeturve. Vetëm kaq”.
Hoti nuk i kurseu dhe deklaratat e ashpra ndaj kryetares së kuvendit, Vjosa Osmani, e cila e kritikoi duke thënë se kryeministri nuk ka eksperiencë në udhëheqjen e vendit në dialogun me Serbinë.
“Përgjigja ime është kjo: Kryetarja e Kuvendit nuk ka përvojë në udhëheqjen e Kuvendit. Është detyra e saj në krye të Kuvendit dhe është mandati im i parë në krye të qeverisë. Të koncentrohemi të gjithë në kryerjen e detyrave kushtetuese që i kemi secili në krye të institucioneve që jemi”. Gjatë të premtes, Hoti do të informojë kuvendin lidhur me bisedimet e fundit në Bruksel.
