Një shumë monetare prej 54.700 euro dhe 1 automjet, të dyshuara të përfituara nga aktivitet i kundërligjshëm, janë sekuestruar nga policia e Lushnjes. Burime zyrtare bënë me dije se është proceduar penalisht poseduesi i tyre për veprën penale “Pastrimi i produktit të veprës penale ose veprimtarisë kriminale”.
“Në kuadër të masave të marra për mbajtjen nën kontroll të situatës së rendit në qarkun e Fierit, janë shtuar kontrollet në akset rrugore si edhe në vendet që frekuentohen nga persona me precedent kriminal. Si rezultat i kontrolleve, nga shërbimet e patrullës së Komisariatit të Policisë Lushnjë, në vendin e quajtur ‘Rotondo e Plygut’, u ndalua mjeti tip “Audi” me drejtues shtetasin Z. Gj. Gjatë kontrollit, në automjetin e këtij shtetasi u gjetën 54.700 euro të cilat dyshohen se janë përfituar nga aktivitet i kundërligjshëm”, njoftoi policia.
Në vijim të veprimeve hetimore, specialistët për Hetimin e Krimit Ekonomik e Financiar në DVP Fier, proceduan penalisht shtetasin: Z. Gj., 28 vjeç, banues në Laç.
Në cilësinë e provës materiale u sekuestrua shuma e eurove dhe automjeti me të cilën udhëtonte ky shtetas.
“Vijon puna për dokumentimin ligjor në lidhje me burimin e të ardhurave të këtij shtetasi, njoftoi policia, ndërsa materialet i kaluan Prokurorisë pranë Gjykatës së Shkallës së Parë Lushnjë për veprën penale ‘Pastrimi i produktit të veprës penale ose veprimtarisë kriminale’”.
