Deputeti demokrat, Flamur Noka ka deklaruar sot se e vetmja zgjidhje për situatën e kanabisit në vend është shpallja e gjendjes së jashtëzakonshme.
“Vetëm 17 % ishte e monitoruar nga Guardia di Finanza. 5-fishimi i sipërfaqes është shifër e frikshme. Ajo që ne kemi paralajmëruar që në Shqipëri është 5-fishuar u konfirmua nga GDF. Ajo konfirmon se edhe fara e re, vietnameze e hyrë në dogana, është mbjellë 2-3 herë, ka pasur 2-3 kultivime. Është një alarm i madh për shoqërinë shqiptare. Karteli po shkatërron gjithçka”, deklaroi Noka për News24.
“Holanda konfirmon, mediat holandeze, zyrtarët holandezë se 2 milionë fara të kanabisit janë blerë në Holandë dhe kanë ardhur në Shqipëri. Ne e bëmë publike dhe e denoncuam. Mirëpo kryeministri, ministri i brendshëm, siç e kanë bërë në modë, mohuan në mënyrë kategorike duke bërë edhe ironi se mos është japoneze. Fara vietnameze por edhe fara e vendit ka dominuar dhe ka mbushur vendin. GDF ka monitoruar vetëm 17% dhe deklaron se ka 5-fishim po të kishte monitoruar gjithë vendin?”, theksoi ai
Sipas Nokës vetëm një gjendje e jashtëzakonshme mund të japë zgjidhje për situatën.
“Drejtorët e qarqeve janë ata që drejtojnë këtë biznes kriminal në Shqipëri. Unë po ju them situata që është në Shqipëri në lidhje me territorin e mbuluar me kanabis është për të shpallur gjendje të jashtëzakonshme. Kupola e policisë e përfshirë në mbjellje dhe trafik të drogës. Përveç fitimeve marramendëse luhet edhe loja për të blerë votën, siç ndodhi në Dibër”, u shpreh Noka.
