Gjergji Ajmasi, rreth 35 vjeç, është personi që dyshohet se është vrarë në Gjirokastër këtë të Mërkurë.
Në një njoftim paraprak për ngjarjen, policia lokale bëri me dije se pas njoftimit nga një telefonatë, efektivët e gjetën në rrugë në gjendje të rëndë.
Rrugës për në spital, Ajmasi ndërroi jetë. Ai dyshohet se është goditur me sende të forta.
“Rreth orës 21:00, në Sallën Operative të DVP Gjirokastër ka ardhur një telefonatë që informonte se në lagjen ‘Zinxhira’, ndodhet një person i shtrirë në tokë. Menjëherë, shkuan shërbimet e policisë dhe shërbimet spitalore dhe transportuan këtë shtetas për në spital, ku gjatë rrugës ka humbur jetën. Nga verifikimet, rezultoi se shtetasi që humbi jetën quhet Gjergji Ajmasi, rreth 35 vjeç, dhe nga këqyrja paraprake e bërë nga mjekët, dyshohet të jetë goditur me sende të forta.
Në vendngjarje ndodhet grupi hetimor dhe po punon për zbardhjen e plotë të ngjarjes.
Policia ka shoqëruar disa shtetas në ambientet e Policisë që mund të kenë dijeni për ngjarjen.
