Aleanca për Mbrojtjen e Teatrit ka depozituar kallëzimin e 6 në SPAK për shembjen Teatrin Kombëtar, ndërsa shprehu vendosmërinë për të mos u tërhequr nga ajo që ka nisur.
Përfaqësues të AMT deklaruan sot se pavarësisht gjashtë kallëzimeve të bëra, nuk kanë asnjë informacion më shumë nga SPAK përveç një shprehjeje se hetimi ka filluar.
Avokatja Adriana Kalaja tha se “objekti i këtij kallëzimi është vendosja e sekuestros mbi projektin e realizuar për ndërtimin e Teatrit të ri nga Bjarke Ingels dhe nga ana tjetër është pezullimi i procedurave të tenderit që ka hapur Bashkia Tiranë në kundërshtim të plotë me dispozitat ligjore në zonën e Teatrit të ri.
Të kallëzuar prej nesh janë Edi Rama me cilësinë e kryeministrit; shtetasi Erion Veliaj, me cilësinë e kryebashkiakut të Tiranës; shtetasi danez Bjarke Ingels, projektuesi i Teatrit të ri dhe shtetasi Shkëlqim Fusha me cilësinë e administratorit të Fusha shpk”.
“Ne kemi konstatuar dhe argumentuar se këta, në bashkëpunim me njeri tjetrin kanë kryer shpërdorim detyre, korrupsion aktiv dhe pasiv dhe marrje ryshfeti në formën e interesave nga zyrtarët që kryesojnë funksione publike.
Deri më sot, përveç një njoftimi që na është bërë se ka filluar një hetim i plotë i gjithanshë e asgjë tjetër nuk dimë në çfarë pozicioni ndodhem hetimet.
Është i gjashti kallëzim dhe kjo tregon se ne e kemi marrë shumë seriozisht çështjen tragjike të shkatërrimin të Teatrit Kombëtar. Mjafton që SPAK të hetojë qoftë dhe një padi e do të gjejë mjaft shkelje”, tha Kalaja.
Një prononcim u bë edhe nga aktori Mehdi Malaj, që bëri një deklaratë thumbuese: “Unë jam tender, ti je tender, ai është tender. Ne jemi tendera, ju jeni tendera, ata janë tendera”.
Edmond Budina theksoi se jemi të vendosur për ta çuar deri në fund këtë krim që është kryer kundër kulturës kombëtare.
“Këtu nuk ka peshq të mëdhenj, ka peshkaqenë të mëdhenj, ndaj ne jemi të vendosur për ta çuar deri në fund këtë akt kriminal dhe ata duhet të paguajnë për këtë krim.
Ne jemi këtu do të do të vazhdojë do të insistojmë në SPAK.
Akuza e Teatrit nuk mbahet vetëm me kallëzime. Ne kemi kallëzuar edhe për vrasje në tentativë, korrupsion, dhe ka shumë ligje që janë shkelur e kjo nuk është vetëm për ta mbajtur gjallë, por që qytetarët të ngrenë zërin dhe mos të rrinë “squk”.
Shikoni dhe rastin e Bechetti: janë 110 milionë euro që duhet t’i pagujamë ne. Pse duhet t’i paguajmë ne?! T’i paguajnë ata njerëz që e kanë kryer! Edhe në rastin e shembjes së Teatrit Kombëtar, shkeljet janë të jashtëzakonshme, ndaj ne do të jemi këtu e do të jemi këtu”, tha Budina.
