Këshilli Bashkiak i Tiranës zhvillon ditën e premte, 7 tetor 2016 në orën 11:00 mbledhjen e radhës ku pritet të diskutohen mjaft çështje të rëndësishme.
Kjo është pohuar dhe nëpërmjet njoftimit të bërë në rrjetet sociale nga kreu i këtij këshilli, Aldrin Dalipi.
Sipas rendit të ditës pritet të kalojnë disa vendime që kanë interes për qytetarët e kryeqytetit. Njëra prej tyre ka të bëjë me zgjidhjen përfundimtare të problemit të pallateve të bllokuara në Tiranë se kanë shkelur lejet e ndërtimit e si pasojë nuk janë të regjistruara do të marrin një certifikatë përdorimi në bashki, që do t’u hapë rrugën hipotekimit të tyre.
Bashkia do të detajojë me urdhër procedurën dhe dokumentacionin që duhet të paraqesin në bashki të gjitha subjektet e interesuara.
Këshilli Bashkiak ndërkohë do të shqyrtojë më 7 tetor, procedurën si do të veprojë Bashkia për pajisjen me certifikatë përdorimi qytetarëve, të cilët prej vitesh edhe pse kanë blerë pronën, nuk kanë të drejtë ta shesin apo tjetërsojnë atë.
Efektet financiare për përballimin e kostos dhe kolaudimit në disa problematika do të përballohen nga buxheti i bashkisë për vitin 2017 dhe vitet në vijim. Vlera që parashikohet të angazhohet në këtë buxhet është 45.000.000 lekë.
Vendime të tjera kanë të bëjnë edhe për dhënien me qera të banesa ndaj shtresave në nevojë dhe rregullimin e tregut të licencave për taksitë. Gjithashtu në rendin e ditës do të jetë edhe dhënia me qera e ish-parkut të transporteve për parkim të flotës së shoqërisë “Eco Tirana” dhe buxhetin afatmesëm 2016-2018 të Bashkisë si dhe vendime të tjera.
