Kryetari i Partisë Demokratike, Lulzim Basha deklaroi pas mbledhjes së grupit parlamentar se opozita do të votojë nesër Strukturën e Posaçme Antikorrupsion. Sipas tij, nga nesër nis makthi për kryeministrin Edi Rama dhe ministrin e Brendshëm, Saimir Tahiri.
“Jemi të qartë, të vendosur dhe për sa mund të jesh i gëzuar në Shqipërinë e sotme, të gëzuar që momenti që kemi pritur prej janarit të këtij viti më në fund ka ardhur, ligji për Strukturën e Posaçme Antikorrupsion, përfshirë Byronë Kombëtare të Hetimit sipas standardeve të Venecias është gati për miratim në Kuvendin e Shqipërisë dhe nesër do të ketë votën e plotë të PD. Ligj që pati pengesa dhe stërkëmbësha të gjithë natyrave, u projektua si një vegël e Saimir Tahirit dhe Edi Ramës. Dy herë Venecia u detyrua të ndërhyjë për të përmirësuar aspektet e këtij ligji në mënyrë që kjo strukturë të ishte vërtet në gjendje të bënte atë për të cilën është planifikuar dhe votuar me 22 korrik, të korrupsionit qeveritar dhe krimin e organizuar. Edhe javët e fundit Rama dhe Tahiri bënë gjithçka që kësaj strukture të veçantë që do ngrihet me ndihmë, trajnim dhe financim të partnerëve tanë strategjikë ti vendosnin mbi kokë figura politike që sot zaptojnë zyrat e shtetit siç janë të emëruarit e Edi Ramës në Drejtorinë e Pastrimit të Parave apo Drejtorinë e Informacionit të Klasifikuar. Nesër nuk do të kenë ditën më të mirë të jetës së tyre, nëse do të zbatohet ashtu siç votohet do të jetë makthi duke nisur nga ministri i Brendshëm tek kryeministri”, tha Basha.
Ndërsa lidhur me Vettingun, Basha tha se ligji është antikushtetues dhe se PD pret që Gjykata Kushtetuese ta çmontojë pjesët antikushtetuese.
Në fund të deklaratës, Basha thumboi edhe ambasadorin amerikan Donald Lu. “Nuk pres unë që ambasadori të më tregojë se cila është detyra ime”, tha Basha.
