Dy 2 persona janë vënë në pranga lidhur me ngjarjen e ndodhur në orët e vona të mbrëmjes së datës 4 korrik, në Burrel, ku mbeti i plagosur me armë zjarri shtetasi E. M. Ata akuzohen për veprat penale “Moskallëzim i krimit” dhe “Veprimet që pengojnë zbulimin e të vërtetës”.
Ndërkohë, mbetet në kërkim autori i kësaj ngjarjeje, i cili është identifikuar nga policia.
“Nga specialistët për Hetimin e Krimit në Komisariatin e Policisë Mat, nën drejtimin e Prokurorisë së Rrethit Gjyqësor Mat, është bërë arrestimi i shtetasve S. K., 38 vjeç dhe XH. P., 20 vjeç, dy banues në Burrel. Arrestimi i tyre u bë pasi nga tërësia e veprimeve hetimore të kryera është arritur që të dokumentohet me prova se kanë qenë prezent kur është plagosur shtetasi E. M. dhe nuk kanë kallëzuar për krimin e kryer, si dhe kanë prishur vendin e ngjarjes duke pastruar ambientin ku ka ndodhur ngjarja”, njoftoi policia.
“Shërbimet e Policisë Mat, në bashkëpunim me strukturat e DVP Dibër dhe DVP Tiranë, po vijojnë punën për kapjen e shtetasit T. (H.) Xh., banues në Tiranë, i cili është shpallur në kërkim policor, pasi dyshohet se më datë 04.07.2020, në vendin e quajtur ‘Kthesa e Sanës’ Burrel, për motive hakmarrjeje, ka plagosur me armë zjarri shtetasin E. M.”, shtuan të njëjtat burime.
