Juventusi vazhdon serinë e fitoreve në kampionat duke mundur 1-3 Genoan në transfertë.
Paolo Dybala, Cristiano Ronaldo dhe Douglas Costa kanë realizuar tre perla në portën e skuadrës vendase, që nga ana tjetër ka shkurtuar diferencat me Pinamonti.
Takimi, i vlefshëm për javën e 29-të, është vendosur në pjesën e dytë, me katër golat që janë realizuar në harkun e 26 minutave.
Ka qenë Dybala që ka zhbllokuar sfidën në minutën e 50-të me një aksion të bukur individual. Cristiano Ronaldo ka dyfishuar avantazhin e bardhezinjve shtatë minuta më mbrapa me një gol të jashtëzakonshëm nga distanca.
Goli i tretë i bardhezinjve është shënuar nga Douglas Costa në minutën e 73-të. Braziliani ka gjetur rrjetën me një goditje spektakolare me të majtën nga jashtë zone.
Vendasit janë kundërpërgjigjur tri minuta më mbrapa me Pinamonti-n, sulmues i huazuar nga Inter-i, i cili ka fiksuar shifrat në 3-1.
Me këtë sukses, Juventus rivendos distancën e sigurisë prej katër pikësh me Lazion e vendit të dytë duke I rritur shanset për tu rikonfirmuar si kampionë të Serisë A.
