Nga BoldNews.al
Bashkia e Krujës, e drejtuar nga Artur Bushi, ka shpallur, së fundmi, fitues të tenderit për pastrimin e qytetit të Fushë-Krujës, kompaninë “Rinia 96”, e themeluar nga dy persona të arrestuar në vitin 2017 për mbi 400 kg kanabis dhe që aktualisht menaxhohet nga një familjare e tyre e afërt.
Në Maj 2020, Bashkia e Krujës shpalli tenderin “Shërbim pastrimi dhe depozitimit të mbetjeve urbane për Fushë-Krujën”, me fond limit 16.6 milionë lekë të reja pa TVSH.
Në tender morën pjesë dy operatorë ekonomikë, një prej të cilëve “Rinia 96”, e cila paraqiti ofertën më të lartë.
Por, autoriteti kontraktues, Bashkia e Krujës, vendosi të skualifikojë operatorin tjetër, pasi, siç deklarohet në dokumentat zyrtare, nuk plotësonte disa kritere.
Në përfundim, Bashkia e Krujës vendosi të shpallte fitues kompaninë “Rinia 96”, e cila do të ofrojë shërbimin e pastrimit për Fushë-Krujën gjatë 12 muajve të ardhshëm.
Arrestimi
Kompania “Rinia 96” është krijuar në vitin 1996 nga Shkëlqim Miri dhe kishte si objekt të veprimtarisë së saj “Pastrim e gjelbërim qyteti, shërbime të ndryshme komunale, shërbime varrimi dhe ruajtje varrezash, etj..”.
Në vitin 2007, Shkëlqim Miri emëron si administrator të kompanisë Bledar Coraj, kunatin e tij, vëllai i bashkëshortes Etleva Miri (Coraj.
Në 29 Janar të vitit 2017, dy drejtuesit e shoqërisë “Rinia 96”, Shkëlqim Miri dhe Bledar Coraj, u arrestuan, në kuadër të një hetimi kundër trafikut të narkotikëve, të zhvilluar nën drejtimin e Prokurorisë për Krime të Rënda.
Në kronikat e asaj kohe raportohet se Miri dhe Coraj u arrestuan së bashku me 5 persona të tjerë, si pjesë e një grupi që merreshin me shpërndarjen e sasive të mëdha të hashashit nga Kruja në drejtim të Tiranës.
Për arrestimin e këtyre personave, forcat e Policisë u koordinuan në një operacion të gjerë në rrugën që lidh Fushë-Krujën me Vorën.
Një sasi prej 425 kg hashash u sekuestrua nga forcat e Antidrogës, ndërsa gjatë kontrolleve në banesat e të dyshuarve u gjet edhe arsenal armësh, 12 automatikë e pushkë.
“Dhurimi” i kompanisë
Dy ditë pas arrestimit, e konkretisht në 31 Janar 2017, Shkëlqim Miri dhe Bledar Coraj, të cilin ishin bashkëpronar 50% me 50% në shoqërinë “Rinia 96”, vendosën të shesin të gjithë aksionet e tyre tek Kujtim Miri, vëllai i Shkëlqim Mirit, për vlerën 200 mijë lekë të reja.
Pas disa muajsh, në Dhjetor 2017, Kujtim Miri vendos t’i dhurojë të gjithë aksionet e kompanisë tek Etleva Miri.
Zonja Miri rezulton të jetë bashkëshorte e themeluesit të kompanisë, Shkëlqim Miri dhe motra e Bledar Coraj, bashkëpronarit të “Rinia 96” deri në momentin e arrestimit, në Janar 2017.
