Pushimi në plazhe, festat në lokalet e natës dhe grumbullimi i shumë personave bashkë për të celebruar një sukses futbolli janë përbërës të zakonshëm të një vere angleze. Por autoritetet e Mbretërisë së Bashkuar janë të shqetësuara lidhur me këto aktivitete pasi mund të shndërrohen në shifra tragjike në këtë kohë pandemie.
Qeveria e Londrës u ka përsëritur qytetarëve thirrjen për ruajtjen e distancimit pasi gjatë javës janë raportuar shkelje të rënda me festa të “çmendura” në zonat e plazhit, të cilat vazhduan dhe u nxitën edhe me shumë me festimet për shpalljen e Liverpool kampion të Anglisë pas më shumë se 30 vitesh.
Forcat e rendit zotohen që të mos lejojnë përsëritjen e incidenteve të tilla, siç i konsideruan ata.
“Ne dëshirojmë që qytetarët të shijojnë zonat e hapura dhe vendet e pushimit si plazhet, por gjithashtu kërkojmë që të shmangim rritjen e rasteve sërish”, shkruan zyra e kryeministrit Boris Johnson në një deklaratë zyrtare.
Ndërkohë, gjatë javës, qindra mijëra britanikë pushtuan zonat e plazhit në Bournemouth dhe Sandbanks për shkak të ditëve më të nxehta të 2020-ës.
Por britanikët duket se e harruan shpejt që Covid-19 nuk është zhdukur ende pasi janë vënë re shkelje të shumta të protokollit të vendosur nga qeveria dhe për pasojë janë vendosur dhe shumë gjoba.
Për shkak të kësaj sjelljeje, të cilën Downing Street e konsideron tepër të rrezikshme dhe të papërgjegjshme, nuk përjashtohet dhe mbyllja e plotë e zonave të plazhit nëse ka një rritje të të infektuarve me koronavirus.
