Juventusi luan mbrëmjen e sotme në orën 21:45 kundër Lecces, në ndeshjen e vlefshme për javën e 27-të të Seria A.
Pas ndalesave të dy rivalëve të Lacios dhe Interit tashmë te Juventusi kanë një avantazh të madh psikologjik. Bardhezinjtë janë +4 nga Lazio, që u mposht me përmbysje nga Atalanta, dhe +8 nga Interi, që bëri një gabim fatal, duke barazuar me Sassuolon.
Nuk pritet të jetë aspak e lehtë për bardhezinjtë pasi Lecce luan për mbijetesë teksa renditen në vendin e 18-të dhe çdo pikë do të ishte e vlefshme në llogaritë përfundimtare të sezonit.
Për sa i përket mungesave në mbrojtje Sarri nuk ka asnjë anësor të majtë në dispozicion. De Sciglio e Alex Sandro janë në infermieri, ndërsa Danilo është i skualifikuar, për këtë arsye në këtë rol pritet të aktivizohet Matuidi. Cuadrado në rolin e tij anësor i djathtë, ndërsa në qendër dyshja Bonucci-De Ligt. Porta këtë radhë do të jetë “pronë” e Szczesnyt.
Në skuadrën kundërshtare, trajneri Liverani vuan një mungesë të rëndësishme, atë të Lapadulës, që përdrodhi kaviljen ndaj Milanit.
