Deputeti Ralf Gjoni e ka cilësuar si një lojë qoftë atë që po ndodh me reformën në drejtësi, ashtu edhe me zgjedhoren.
“Janë lojra, akrobaci, ku po shkojmë, ku do të shkojmë me këto situata”, tha Gjoni në seancë plenare.
Pas raporteve të paraqitura nga KLP dhe KLGJ, Gjoni tha se “në 2014 nisën negociatat për reformën në drejtësi, po ku jemi sot, ku janë anëtarët e Gjykatës së Lartë, po asaj Kushtetuese”.
“E mbani mend kur në lozhën e Kuvendit puthej Lu me Vlahutin. Iku Lu erdhi Kim, do iki Kim do vijë Xhim, po ne ku po shkojmë? Kemi bërë lojra dhe akrobacira. Nuk do të kemi reforma në drejtësi, nëse nuk reformohet politika. Nuk mund të reformohet politika, nëse nuk reformohet sistemi zgjedhor. Kemi kërkuar reformimin e sistemit zgjedhor. Del sot Rama dhe na thotë jam për lista të hapura, hapini listat, kush ju pengon”, tha Gjoni.
Në vijim, deputeti theksoi se është e turpshme ajo që po ndodh në sytë e shqiptarëve.
“Ambasadorja e nderuar amerikane shkon te Komisionet e Vetting dhe thotë të ndalohen lojrat me Vetting. Kjo situatë duhet të marrë fund”, tha Gjoni.
