Nënkryetari i PD-së, Edi Paloka, në Ora News, tha se dera e kësaj partie, ka qenë e hapur për të gjithë ata që ndjekin programin e saj.
Duke komentuar deklaratat për një hapje të PD, Paloka u ndal te disa individë që gjuajnë me gurë dhe kërkojnë të hapet dera për ta, edhe kur ajo është e hapur, pasi vjen momenti për rikthim në pushtet.
“Nuk duhet të ngatërrojmë ca gjëra. Disa kanë dalë me dëshirë nga PD, dhe asnjëherë nuk e kanë patur derën e mbyllur.
Nëse del nga dera, gjuan me gurë dhe kur mendon se erdhi çasti për tu rikthyer në pushtet vjen prapë te dera dhe bërtet hapni derën, ndërkohë që dera është hapur, këta nuk kanë ndërmend të jenë as pjesë e PD, as të ndjekin programin e PD.
Janë disa individë që për mua nuk kanë arsye se pse vazhdojnë të bërtasin dhe shpresojnë që PD ti katapultojë prapë në majë sepse dera është e hapur për këdo që ndjek programin e PD dhe qëllimet e opozitës, fillimisht largimin e Ramës”, tha Paloka.
