Ministri për Diasporën, Pandeli Majko, duket se ka nostalgji për Parlamentin e viteve 1991-1996. Në atë kohë Majko ishte deputet i PS-së nga rradhët e FRESSH, atje ku militonte si pjesë e PS-së bashkë me emra të tjerë të njohur si Ilir Meta, Ilir Zela, Ndre Legisi, Monika Kryemadhi etj.
Gjatë homazheve të sotme për studiuesin dhe publicistin Moikom Zeqo, ish-kryeministri socialist, aktualisht ministër në Qeverinë Rama, Pandeli Majko, ka folur me elozhe për PS-në e shkuar.
Duke kujtuar kohën e viteve 1991-1996 kur Moikom Zeqo ka qenë deputet i kësaj partie, Majko tha se ai grup parlamentar ka qenë më i miri që ka pasur ndonjëherë PS-ja.
“Për mua ai mbetet shok, mik. Është pjesë e asaj kur flasim për grupin parlamentar të PS, kam në mendje grupin më të mirë që kemi pasur grupin 91-96. Ai ishte ndër më të veçantit e atij grupi. Se them se është rasti, por ai i tillë ishte. Jo vetëm ishte një politikan i mirë, por një njeri i mirë”, u shpreh Majko.
Por ministri ka shmangur komentet mbi Parlamentin e sotëm. Gjithsesi ai ka zgjedhur të shprehë mendimin e tij me një shtrembërim buzësh.
Majko nuk është i pari politikan që flet me nostalgji për përbërjen e Parlamentit shqiptar në vitet e para të demokracisë, ku numrin më të madh të deputetëve e përbënin mjekë e pedagogë, diplomatë dhe inxhinierë, të cilët sot numërohen me gishtat e duarve.
