Gjykata Penale në Maqedoninë e Veriut ka dhënë vendimet lidhur me të pandehurit për çështjen “Reket”. Bojan Jovanovski – Boki 13 është dënuar me 9 vite burg, ndërsa ish shefja e Prokurorisë Speciale, Katica Janeva me 7 vite burg. Bojan Jovanovski, vendimin e gjykatës e cilësoi si vendim tendencioz dhe politik.
“E di sa do të ma zgjasni paraburgimin, sepse për këtë keni urdhër”, u shpreh Bojan.
Ish shefja e prokurorisë Speciale, Katica Janeva nuk ishte prezentë në seancën e sotme të rastit “Reket”, për të dëgjuar aktgjykimin.
Lëndën gjyqësore kundër Jovanovskit dhe Janevës e udhëhoqi gjykatësja Vaska Nikollovska-Masevska, ndërsa përfaqësues i akuzës ishte prokurorja Villma Ruskoska.
Gjykimi për rastin “Reket” filloi në nëntor të vitit 2019. Në seancën e parë, i akuzuari i dytë, Zoran Milevski – Kiçeec e pranoi fajin dhe u dënua me tre vite burg.
Boki 13 u akuzua se, ndikoi te Janeva për lëndën që e udhëhiqte PSP-ja, “Perandoria”, për t’ia lehtësuar pozicionin e të dyshuarit Orçe Kamçevit. Si shpërblim, Janeva ka marrë mobilie në vlerë prej 296.040,00 denarë dhe para në vlerë prej 50,000 euro, ndërkaq Boki 13 dhe Zoki Kiçeec shpërblim prej 1.500,000 euro.
Rasti “Reket” është zgjeruar në “Reket 2”, ku të përfshirë janë edhe organizata “Lidhja Ndërkombëtare” Boki 13, Frosina Remenski, Mile Jovanovski, Jasna Mandiq, Kristina Karavijanova dhe Bojan Novakovski.
