Agron Duka, kryetar i PAA-së, në koalicion me PD e Lulzim Bashës, është shprehur i gatshëm të ndihmojë me gjithçka ish-liderin historik të socialistëve, Fatos Nanon, nëse rikthehet në politikë.
Duka ka qenë një nga bashkëpunëtorët e afërt të Nanos dhe miqtë e tij, ndërsa nuk ka nguruar të shprehë keqardhjen për tërheqjen nga politika të ish-kreut të PS-së. Nano u tërhoq nga politika në 2005, kur humbi zgjedhjet parlamentare, duke i lënë drejtimin e PS, Edi Ramës. Tentoi të rikthehej në politikë në 2007, kur aspiroi për postin e Presidentit, por nuk u mbështet as nga PS e drejtuar nga Rama dhe as nga LSI e drejtur nga Ilir Meta.
Në studion e Fax News, Duka ka zbuluar se gjatë një drekë që ka pasur me Nanon e ka pyetur për rikthimin e tij në politikë, dhe pavarësisht se nuk ka marrë një përgjigje të prerë, i ka lënë të kuptojë se nuk e ka në plan.
Megjithatë ish-deputeti është shprehur se nëse Nano vendos të rikthehet do ta ndihmonte me çfarë të mundte.
“Nano fatkeqësisht u largua shumë shpejt nga politika, në moshën 53-vjeçare. I mungon Fatos Nano, kam një impresion dhe përshtypje shumë shumë pozitive, jo vetëm si njeri por si politikan, ekonomist.
Unë i jap Nanos meritën e reformimit të PS-së nga parti komuniste, ta transformojë dhe fus në tregun politik shqiptar që ka qenë periudha më e vështirë. Sot duket e thjeshtë, por ishte e vështirë të thoje në atë kohë se jam anëtar i PS-së. Ai nuk ka luftuar kurrë ‘armiqtë’ e tij politik, por të bashkëpunojë, nuk mendoj se ka pasur një njeri më bashkëpunëtor se ai.
Nuk besoj se mund të kthehet, nuk flas me opinione, flas me fakte, unë kam kontakte me Nanon, dhe para disa muajsh kam drekuar me të dhe e kam pyetur direkt, kam parë një mungesë dëshire për tu rikthyer.
Megjithatë ‘kurrë mos thuaj kurrë’ është tamam në moshë dhe unë do dëshiroja të rikthehej dhe unë do të isha i lumtur, do kontribuoja që ai të rikthehet sërish, por është në dorën e tij”, tha Duka.
