Deputeti Lefter Koka tha se identifikimi biometrik i votuesve nuk do të zgjidhë problemin e manipulimeve, veçanërisht në zonat rurale.
Koka tha se ai i forti i zonës do tí marrë prapë kartën e identitetit atyre banorëve dhe do të votojë njëlloj sikundër ka ndodhur dhe ai ose ajo që i merret karta nuk ka guximin ta kundërshtojë.
Sipas deputetit, rezultatin në një qendër votimi e përcaktojnë komisionerët dhe kjo tashmë dihet.
“Janë ata që tolerojnë çdo gjë, pra përcaktojnë rezultatin. Ndaj dhe depolitizimi i komisioneve zgjedhore duhej të kishte ndodhur për të parandaluar këtë fenomen”, tha Koka.
Ai pohoi se nuk e dinte nëse do të ishte deputet ose jo në 2021, por vota e tij do të ishte për Partinë Socialiste.
Lidhur me ndalimin e koalicioneve, Koka u shpreh se po të merren në shifra absolute atëherë favorizohet PS, por situate nuk është ajo e para 8 viteve.
“Në 2017, LSI kandidoi e vetme në zgjedhje dhe mori 18 deputetë. Por në 2017, PS mori 4 deputetë më shumë, dhe mendoj se kjo ndodhi për shkak të neglizhencës nga forcat e tjera”, tha Koka.
Në emisionin Real Story, Koka tha se është pro listave të hapura.
“Ne kemi një sistem e kod zgjedhor që janë kontestuar që në gjenezë. Në çdo rast ka qenë i kontestuar nga pala humbëse zakonisht, por edhe nga ndërkombëtarët. Thjesht zëri është ngritur më shumë nga humbësit sesa fituesit. Nuk mendoj se duhet të vazhdohet me këtë sistem, ku 2-3 individë të vendosin për politikën.
Sot deputetët nuk kanë lidhje me hallet e njerëzve, as me zonën e tyre elektorale. Sot fatmirësisht kemi disa deputetë që nuk kanë shefa. Unë mendoj se këta deputetë kanë thënë atë që do të donte qytetari shqiptar. Sot kërkohen listat e hapura. Nuk ka pse të kontestohet kjo gjë”, tha Koka.
