Ditët e fundit është përfolur për një largim të mundshëm të Alban Hoxhës nga Partizani. Portieri thuhej se kishte refuzuar rinovimin me klubin e kuq, pasi kishte ngelur i pakënaqur nga paga e ofruar dhe qëndrimi në pankinë i Hoxhës për dy ndeshjet e fundit u duk se konfirmoi diçka të tillë.
Megjithatë tashmë raportohet se portieri është takuar me presidentin Gaz Demi dhe është arritur marrëveshja edhe për sezonin ardhshëm. Kontrata aktuale i përfundonte më 30 qershor.
“Arrihet marrëveshja. Alban Hoxha do të qëndrojë me Partizanin për të paktën edhe 1 vit. Kapiteni dhe portieri i Partizanit ka arritur marrëveshjen me presidentin Gaz Demi. Ofertat nuk munguan për të, por Partizani mbetet mbi të gjithë”, shkruan Procesi Sportiv.
32-vjeçari, është pjesë e Partizanit që prej vitit 2013 dhe duket se karriera e tij do të vazhdojë me kampionët në fuqi të Superligës.
