Maturantët do të protestojnë sërish sot para Ministrisë së Arsimit. Protesta do të nisë në orën 11:00, ndërsa përmes rrjeteve sociale iu është bërë thirrje maturantëve që të shpëtojnë të ardhmen e tyre dhe të dalin në protesta edhe në qytetet e tjera të vendit.
Ata kërkojnë rikishikim të tezës së Gjuhës Shqipe dhe Letërsisë, ndërsa pretendojnë se testi i kësaj lënde ishte absurd.
Në protestën e djeshme nuk munguan pankartat me personazh Turin si dhe gjuajtjet me vezë në drejtim të godinës së Ministrisë.
Pas më shumë se 2 orë proteste, disa nxënës u futën në ambjentet e Ministrisë së Arsimit për të dorëzuar një aktkonstatim prej 10 pikash të hartuar prej tyre dhe ekspertë të fushës. Ata kanë paraqitur me shembuj në këtë draft, ku sipas tyre tregojnë dhe gabimet në hartimin e tezës së Gjuhë – Letërsisë.
Maturantët kërkojnë gjithashtu që të mos shkruajnë emrat e tyre në tezat e provimit.
Ndërkohë protesta pati edhe nga maturantët në Shkodër. Ata u shprehën të gatshëm të bojkotojnë provimin e radhës të maturës nëse Ministria nuk tërhiqet për të plotësuar kërkesat e tyre.
