Sekretari i Përgjithshëm i OKB-së, Antonio Guterres, paralajmëroi sot për një krizë globale ushqimore me pasoja afatgjata për qindra miliona fëmijë e të rritur, nëse nuk bëhet gjë për të lehtësuar pasojat e pandemisë.
“Sistemet tona ushqimore nuk po punojnë më dhe pandemia e COVID-19 po e përkeqëson situatën”, tha Guterres.
“Këtë vit, 49 milionë njerëz të tjerë mund të bien në varfëri ekstreme për shkak të krizës së shkaktuar nga pandemia”, shtoi ai.
Kreu i OKB-së bën thirrje, në veçanti, për të mbrojtur punëtorët në sektorin e ushqimit, për të ruajtur ndihmën humanitare, si edhe për të forcuar mbështetjen për industrinë ushqimore dhe tregtinë, në mënyrë që të shmanget ndërprerja e zinxhirëve të shpërndarjes.
