Gjykata e Apelit të Tiranës ka rrëzuar kërkesën e kreut të Vetëvendosjes, Boiken Abazi, për heqjen e masës së sigurimit, detyrim paraqitje.
Kreu i Vetëvendosjes në Tiranë u ndalua ditën e protestës kur u shemb Teatri Kombëtar.
Lëvizja Vetëvendosje shprehet se sistemi i kapur i drejtësisë në Shqipëri po vendoset në shërbim të shtetit policor.
“Sot, Drejtori Ekzekutiv i Lëvizjes VETËVENDOSJE! Qendra në Shqipëri, Boiken Abazi, dhe avokatja dhe aktivistja Suela Hasani, u paraqitën në seancën e Gjykatës së Apelit, pas dorëzimit të ankesës kundër vendimit të Gjykatës së Shkallës së Parë. Në këtë seancë u kundërshtua nga avokatja Hasani vleftësimi i arrestit dhe masat detyruese për paraqitjen e Boiken Abazit çdo javë në prokurori, marrë parasysh që prokuroria nuk ka paraqitur asnjë material si provë për akuzat e ngritura për këtë rast. Pavarësisht mungesës së provave dhe parregullsive të shumta procedurale, Gjykata e Apelit e hodhi poshtë ankesën pa dhënë asnjë shpjegim. Prokuroria dhe gjykata ka vendosur masa të ndryshme detyruese edhe ndaj 7 qytetarëve të tjerë që u arrestuan në 17 maj dhe u mbajtën 3 ditë në paraburgim”, thuhet në një reagim të Vetëvendosjes.
“Sistemi i kapur i drejtësisë në Shqipëri po vendoset në shërbim të shtetit policor. Përndjekja politike e qytetarëve po vazhdon përmes gjykatave, të cilat nuk kanë marrë asnjë masë ndaj atyre që kryen krimin e shumëfishtë institucional për shembjen e jashtëligjshme dhe antikushtetuese të objektit Monument Kulture të Teatrit Kombëtar dhe kundër dhunës së shfrenuar policore ndaj qytetarëve, që u ekzekutua me urdhër nga lartë. Lëvizja VETËVENDOSJE! Qendra në Shqipëri kërkon drejtësi për 17 majin dhe ndalimin e persekutimit politik ndaj qytetarëve që dolën në mbrojtje të trashëgimisë sonë të përbashkët”, mbyllet reagimi.
