Aleati i Lulzim Bashës, kreu i LZHK, Dashamir Shehi, tha se kjo reformë zgjedhore nuk zgjidh problemin, pavarësisht se mund të jetë e pranueshme.
Shehi tha se reforma duhej të kishte një frymë më të madhe, të përfshihej sistemi, ndërsa këto që janë diskutuar janë teknike.
“Duhen bërë një palë zgjedhje që mos vidhen më vota, që shqiptarët të shkojnë të votojnë, dhe zgjedhjet të jenë të pranueshme”, tha Shehi.
Ai u shpreh se vendi ka nevojë për një reformë të madhe politike dhe Kushtetuese, për të bërë një gjysëm shteti, pasi kjo reformë që trumpetohet kaq shumë janë çështje që nuk kuptohen nga shumica e shqiptarëve.
“Mendoja që kjo ndërhyrje e ndërkombëtarëve do të ishte për një reform të thellë, ambasadorët nuk u morën fare me çështjet elektorale, thjesht treguan se ky është një vend i mbrapsht që duhej të viheshin në rrjesht aktorët politikë”, tha Shehi.
Ai tha se shpresonte që Ambasadorja Yuri Kim do të ndërhynte për të ndryshuar sistemin në Shqipëri.
“Unë kam një jetë që merrem me zgjedhjet, nuk mund të më mësojë Ambasadorja e SHBA. Më vjen keq për ambasadoren për angazhimin që ndërmorri, më vjen keq për Lulzim Bashën, por mund të them se asgjë nuk kanë bërë me këtë që flitet”, tha Shehi.
Ai tha se identifikimi biometrik i zgjedhësve është mjaft i rëndësishëm, pasi të paktën mund të ndalojë vjedhjen e votës, përmes rritjes së numrit të votuesve.
“Në këtë vend nuk votojnë më shumë se 1.3 mln shqiptarë, ndërkohë që thonë votuan 3.2 mln, ndërkohë që jemi gjithsej 2.7 mln”, tha Shehi, duke shtuar se “ky sistem duhej të ishte ndryshuar, për t´iu dhënë një shans alternativave të reja për të konkuruar në zgjedhje”.
“Megjithë defektet që ka opozita, sistemi apo Lulzim Basha, mendoj se opozita i fiton zgjedhjet, pasi shqiptarët janë të zhgënjyer nga Edi Rama dhe Rilindja”, tha Shehi. Ai këshilloi Bashën që për të fituar zgjedhjet nuk mjaftonte vetëm inati i shqiptarëve ndaj Ramës, por duhet ti afrojmë një alternativë tjetër, ti japim shpresë.
